港聞

港聞二

【Emily】誠哥200蚊心意券 贈醫局9.7萬人

【明報專訊】長和系創辦人李嘉誠過去以唔同行動力撐醫護人員,噚日立春,誠哥又出手,送上「春天的禮物」——向醫管局全體9.7萬名人員送上有佢簽名嘅心意卡,醫護人員手持心意卡,喺下周一(8號)至5月底,可以去全港百佳店舖換取及使用200蚊現金券。換句話說,李嘉誠總共向醫管局人員送出價值1940萬元嘅現金券。

李嘉誠基金會噚日喺facebook上載心意卡相片,卡封面印咗「醫護香港一脈相連 感恩.感激」字句,有兩個心心圖案連住,卡入面寫上「謝謝您們一直守護香港人的健康,我與全港市民一樣,內心都為您們鼓掌!一點心意,與您共勉」,並hashtag「+×心上人」、「心有醫護」等。小編話運送心意卡到各醫院「同押送現金一樣刺激,多謝上下一心撐醫護」。

唔少收到卡嘅醫管局人員喺基金會fb留言時附上心意卡表示感謝,唔少人都祝誠哥身體健康,又希望疫情好快遠離所有人。

相關字詞﹕醫管局 現金券 百佳 李嘉誠基金會

上 / 下一篇新聞