港聞

港聞二

【Emily】挪威議員讚一生爭取港人權 李柱銘獲提名諾貝爾和平獎

【明報專訊】再有香港人獲提名競逐諾貝爾獎!挪威國會議員Mathilde Tybring-Gjedde、Peter Frølich提名咗民主黨創黨主席李柱銘(馬丁)競逐諾貝爾和平獎,Mathilde Tybring-Gjedde喺facebook表示,李柱銘喺香港有「民主之父」之稱,一生致力爭取香港人權、民主;希望今次提名亦可以啟發香港民主運動,以及世界各地爭取自由嘅人。

現年82歲嘅李柱銘,目前因為前年8月18日嘅維園「流水式集會」,與另外8人被控組織、參與未經批准集結罪,案件將於本月16日審訊。

港英文網媒HKFP亦獲提名

除咗馬丁,其他地區都有多人或組織獲提名諾貝爾和平獎。路透社報道,俄羅斯反對派領袖納瓦爾尼(Alexei Navalny)、世界衛生組織,以及「環保少女」通貝里(Greta Thunberg)都獲挪威國會議員提名。其他獲提名嘅仲有香港英文網媒「Hong Kong Free Press」、美國前總統特朗普、美國去年爆發嘅「黑人的命也是命」(Black Lives Matter)運動等。

諾貝爾和平獎預計將於10月頒發,根據官網,每年國會議員、官員、大學教授、歷屆和平獎得主等都有權提名。

相關字詞﹕諾貝爾和平獎 李柱銘

上 / 下一篇新聞