港聞

港聞二

【Emily】話自己體質「超級敏感」 唐唐冇去深圳打疫苗

【明報專訊】香港友好協進會噚日探訪灣仔警察總部,協進會成員由全國政協委員、人大代表組成。政協、人代上月分批到深圳接種新冠病毒疫苗,協進會會長、全國政協常委唐英年(唐唐)噚日透露佢並無去打疫苗,解釋自己係「超級敏感」嘅體質,連接種流感疫苗亦會過敏。雖然冇打疫苗,但唐唐相信唔會影響3月到北京開兩會,佢話目前冇要求與會者一定要先接種疫苗。

率友好協進會慰問警隊

唐唐話,政協、人代好快會到深圳打第二劑疫苗,然後隔一排,就會再到深圳檢驗有冇抗體。有份到深圳打疫苗嘅政協同Emily講,除咗唐唐,仲有幾十個政協、人代冇去接種疫苗。本來話兩星期後打第二針,但內地研究過,接種兩針嘅時間唔適宜隔得太短,所以會喺今個月18號先去深圳打第二劑,中間隔咗差不多4個星期。

臨近農曆新年,唐唐噚日率領其他協進會成員去慰問警隊,順便致送綠色食品。佢感謝警隊為港人付出,指佢哋喺過去兩年嘅工作艱巨,又認為警隊同市民關係良好,讚揚警方義不容辭咁維護本港嘅法治同治安。

相關字詞﹕疫苗 唐英年 友好協進會

上 / 下一篇新聞