港聞

港聞二

【Emily】「數碼之源」雕塑變垃圾叢 深水埗區會一致通過拆走

【明報專訊】深水埗區議會地區設施委員會噚日一致通過動議,拆除港鐵深水埗站D出口、電腦中心附近,由2004年豎立至今嘅《香港數碼之源》雕塑。拆咗之後,個空間做咩好?提出動議嘅深水埗區議員劉家衡喺facebook度收集意見,有唔少人留言話「最好咩都唔好整」,一係畀番條路嚟行吓,一係整啲長櫈就算喇。

拆咗放咩好?

網民:最好乜都唔好整

劉家衡同另一區議員李文浩一齊提動議,佢哋話呢個雕塑原本係配合香港電腦商會主辦、深水埗區議會協辦嘅香港電腦節,以促進本土經濟,但電腦節都停辦多年,深水埗賣電腦用品、電子產品出晒名,唔使留住呢幾噸銅鐵。當年呢個雕塑開幕,時任民政事務總署署長陳甘美華都有出席。

深水埗區議會主席、民協楊彧話,當年SARS後想振興社區經濟,利用呢個雕塑介紹深水埗賣電腦,但𠵱家「黃金賣電腦都已經出晒名」,今日呢個地標已經淪為垃圾叢,好多人丟垃圾甚至針頭入去,環境衛生好差,事實上存在感都好低,不如開放番呢個公共空間出嚟更有意義。佢話,民政處收到呢個動議後,會計吓究竟拆除要幾錢,再上區議會拎撥款。

相關字詞﹕數碼之源 李文浩 劉家衡 深水埗區議會

上 / 下一篇新聞