港聞

港聞二

【Emily】批張志剛做政協唔識「協商」 曾鈺成:侮辱咗你老闆梁生

【明報專訊】對於特首要維持「選舉」,定改由「協商」產生,特首林鄭月娥就話唔想參與呢種隔空爭拗,不過討論無因而停止。全國政協委員張志剛上周四喺本報撰文,話「協商」產生特首根本唔需要修改《基本法》附件一,附件一嘅程序只規定「選舉」呢種產生辦法。立法會前主席曾鈺成前日拍片隔空反駁,不點名回應張志剛「咁都講得出」,話「有一啲理論家走出來寫文章,愈講愈離譜」。

張志剛喺文章話,「協商」就係「中央問問各方意見,聽後再作決定」。曾鈺成喺「灼見名家」節目話《基本法》規定,協商或選舉嘅產生辦法同樣受附件一規定,文字寫得好淺白,回應張志剛嘅講法時,佢連問兩次「咁你都講得出?」

張志剛撰文:附件一只限選舉非協商

曾鈺成:咁你都講得出?

曾鈺成認為,協商都要按照規矩、辦法做事,不點名話張志剛作為「中國人民政治協商會議全國委員會委員」,竟然唔知道「協商」係乜嘢,質疑張有冇睇過政協嘅章程。

曾鈺成引述章程,話「協商民主是我國社會主義民主政治的特有形式和獨特優勢」,質疑張志剛嘅說法,「係咪褻瀆我們國家嘅獨特優勢——協商民主呢?係咪侮辱咗你嘅老闆,身為全國政協副主席嘅梁(振英)先生呢?」

相關字詞﹕特首選舉 張志剛 協商 曾鈺成

上 / 下一篇新聞