港聞

港聞二

【Emily】89歲生辰 陳日君被爆行上山探監傷腰背

【明報專訊】天主教香港教區榮休主教陳日君樞機噚日89歲生日,「天主教信友平台」刊登咗一篇樞機軼事文章作為「禮物」。文中爆料話,樞機有一次去大嶼山塘福懲教所探監,因錯過每小時一班嘅巴士而強撐上山,點知兩日後腰背劇痛,醫生推斷係強行上山所致;又形容樞機每次探望在囚者,都將自己拋諸腦後,下晝3、4點食午飯係平常事,甚至一日內去勻羅湖、小欖、大欖同赤柱探監。

話90歲要行「最後一次」獅子山

文中又提到,樞機2012年去波蘭,當地領隊提醒如見到有人要錢,千祈唔好畀,否則會引來更多人;但有小朋友走近樞機要錢,樞機二話不說打開銀包拎錢畀佢,形容樞機當時將幫助小朋友先於一切其他考慮。

作者仲話,疫情嚴峻,每次見到樞機都會檢查佢有冇戴好口罩、叫佢唔好捽眼、問佢有冇洗背囊,樞機每次都答「大菌食細菌」;有一次樞機洗完背囊,問作者係咪好乾淨,作者就反問佢,幾年冇洗背囊,盆水係咪變咗黑色,樞機就緘默唔答。

文中引述樞機話,90歲要行「最後的最後的最後一次」獅子山,作者話以前會極力勸止、怕佢太辛苦,𠵱家就諗,如樞機到時仍有體力精神上獅子山,代表佢健康,必定奉陪。Emily都祝樞機生日快樂,健健康康!

相關字詞﹕生日 探訪在囚人士 陳日君

上 / 下一篇新聞