港聞

港聞二

【Emily】免再次「無官員嚟」 工務小組議員 要求分開表決

【明報專訊】立法會財務委員會上周五通過涉及約295億元嘅4個項目,其中3個冇官員現身會議,項目「特快」獲通過。財委會主席陳健波提醒,議員要預先要求分開表決,官員先會嚟開會。經一事長一智 ,喺噚日工務小組上,實政圓桌田北辰、自由黨邵家輝分別要求項目分開表決。

工務小組主席謝偉銓開會前話,留意到財委會上有關分開表決嘅討論,重申每次委員會通過項目後,佢都會提醒委員係咪有需要分開表決。雖然邵家輝唔係小組委員,但噚日都有出席會議,喺準備投票時同主席講,話要求分開表決項目,等自己有機會喺財委會再提問。

小組噚日審議新市鎮及市區發展項目,包括東涌新市鎮擴展、P1公路(大蠔至欣澳段)嘅工程研究,以及喺東涌新市鎮擴展(東)提供區域供冷系統,分別涉款約193億、1.3億和39億元。田北辰追問P1公路嘅工程,質疑過渡期間車流仍會塞回青馬大橋,「我覺得P1係廢嘅」。會上最終以13票贊成、1票反對通過,項目將會交上財委會審議。

相關字詞﹕立法會 財務委員會 工務小組

上 / 下一篇新聞