港聞

港聞二

【Emily】立會通過准用Zoom開Panel 謝偉俊論開會諗到網上性生活

【明報專訊】立法會噚日通過委員會會議可以用Zoom開會,建制派謝偉俊(Paul)喺審議期間突然提起性生活。阿Paul話,理解有啲議員可能比較old school(老派),傳統上要親身開會,佢話「我理解𠵱家電子裝香非常之普遍……有啲人講性生活都可以喺網上解決好多,呢個唔再講啦,但事實上人類嘅智慧遇到唔同挑戰時,總有辦法去解決」。

熱血公民鄭松泰表明唔贊成動議,話因防疫用Zoom開委員會會議,但財會、內會、大會都要實體開,即一個星期有兩日要返立法會,「(動議)根本達唔到防疫目的,只係形式上做啲嘢」。立法會最終以34票同意、反對同棄權各1票通過動議。

秘書處噚日下晝立即安排Zoom示範環節。金融界議員陳振英有份出席,佢話會上試用咗3種虛擬背景,包括會議室座位、立法會大樓外貌、立法會嘅「立」字標誌,效果唔錯。秘書處仲播放短片,話畀議員知應該要點坐,開會時可以幫自己打燈。

陳振英:有人擾亂可「閂鏡頭」

議員關心點投票,陳振英話噚日都有模擬試一下,佢話日後要舉手投票,例如贊成者舉手後,秘書處會逐一讀出佢哋嘅名;投反對或棄權票都有同樣嘅程序。陳振英覺得雖然投票時間耐咗,但可以確保唔會搞錯投票意向。至於點樣處理擾亂秩序者,佢話會上無討論,但認為情况較實體開會更容易處理,「好簡單,如果控制唔到,直情閂咗你個鏡頭」。

相關字詞﹕陳振英 立法會

上 / 下一篇新聞