港聞

港聞二

工聯會見財爺 籲唔好「撳住荷包」

【明報專訊】港府正就2021/22年度《財政預算案》諮詢公眾,財政司長陳茂波噚日同工聯會見面。工聯會會長吳秋北建議政府撥出150億元失業援助金,津貼失業者每月最多9000元,為期6個月。陳茂波早前話政府財政緊張,被問應唔應該推行失業援助金,工聯會麥美娟(Alice)就話,政府盈餘應喺困難嘅時刻支援市民,而非「撳住荷包」。

麥美娟倡設10億打疫苗保障金

疫情持續,Alice又建議政府推出便利旅遊嘅「疫苗護照」,接種疫苗者可免檢疫前往內地,以增加注射誘因。佢又建議撥款10億設「疫苗注射保障金」,強調並非派錢畀接種市民,而係減輕市民對疫苗副作用嘅憂慮。

工聯會鄧家彪預計,隨住「保就業」計劃結束,首季失業率或升至7%。佢建議政府向市民派發8000元電子消費券,可用作購買日常生活用品,用以振興疫後經濟。

相關字詞﹕失業援助金 工聯會 預算案

上 / 下一篇新聞