港聞

港聞二

開會五缺二 灣仔區會又流會

【明報專訊】新冠病毒疫情持續,民政事務總署早前請各區議會延遲開會,噚日灣仔區議會自行搵地方繼續開會,不過只有5名區議員出席,仲差兩個人先夠法定人數,所以最終要流會。灣仔區議會主席楊雪盈就話,對於近日連續兩次流會覺得遺憾,認為無論區議員來自乜嘢政治派別,都應該出席會議履行職責。

建制黃宏泰話疫情嚴峻唔開會

噚日會議原定下晝兩點半舉行,但因為人數不足流會,楊雪盈曾要求工作人員打電話畀其他議員,問佢哋係咪嚟緊。建制派黃宏泰事前通知缺席,解釋因為疫情嚴峻所以唔會開會,但楊雪盈指按例唔能夠接納呢個理由。

4民主派議員揀去民署抗議

究竟其他缺席嘅議員去咗邊呢?同屬民主派嘅梁柏堅、張嘉莉、李永財、邱汶珊原來就去咗民政事務總署及灣仔民政事務處遞交抗議信,梁柏堅喺facebook話,民政處唔邀請相關政府部門列席噚日嘅會議,做法唔合理,所以喺會議時間去遞抗議信。

另外,深水埗區議會原定噚日開會討論深水埗主教山配水庫,但由於民政處唔支援,最終會議要取消,深水埗區議會主席楊彧就話𠵱家約緊水務署跟進。

相關字詞﹕主教山配水庫 區議會 楊雪盈

上 / 下一篇新聞