港聞

港聞二

胡志偉報平安 籲關心在囚手足 還押日半四餐腿蛋 黃碧雲嘆惡頂

【明報專訊】警方上周嘅「35+大搜捕」行動,其中民主黨胡志偉因未有交出「英國國民(海外)護照」(BNO)旅遊證件,違反保釋條件,還押荔枝角收押所。近日天氣嚴寒,還押生活會否難捱?志偉嘅同事就報平安,話探訪過佢,指志偉平日都有聽從網民建議,好好鍛煉身體,身體狀况仍然唔錯。職員又話,志偉早已預料「港共政權」唔會放過任何一名異見者,故被捕後心境仍然十分平靜。

志偉嘅同事喺佢facebook出帖,話感激好多市民關心志偉。志偉透過職員轉述,話等待上庭嘅還押日子枯燥乏味,但會保持心境清明,把握時間沉澱自己,反思過去20多年嘅從政生涯。志偉又呼籲大家關心在囚嘅「手足」,話佢哋有啲人已被還押接近一年仍未審訊,有啲已被判刑數年,叫大家多寫信同手足分享日常生活點滴,喺寒冬送暖。

胡志偉保釋申請下月再訊

志偉嘅同事就話,街坊亦可寫信慰問志偉,可將信交去九東多個民主黨區議員嘅議辦。志偉嘅保釋申請,下月8日再訊。

民主黨黃碧雲亦係大搜捕被捕者之一,佢上周三同岑子杰、施德來三人被扣留喺油麻地差館逾36小時,佢話臨時羈留室好似雪櫃咁凍,並遭指令除襪。佢話還押期間有食物供應,不過一連四餐都係火腿蛋餐:早餐係腿蛋治加一杯凍水、午餐火腿蛋飯、晚餐火腿蛋飯加一條菜;第二朝早餐又係腿蛋治,話真係難頂。

相關字詞﹕35+大搜捕 黃碧雲 胡志偉

上 / 下一篇新聞