港聞

港聞二

【Emily】擴兩蚊乘車優惠 羅致光話可義務巡查一日

【明報專訊】立法會福利事務委員會噚日討論長者「兩蚊搭車」優惠擴展到60至64歲,好多議員都要求有關部門加強巡查、檢控,加強阻嚇,打擊濫用。負責計劃嘅勞工及福利局長羅致光就話,加強巡查就要加人手,仲自告奮勇話可以義務做一日,但相信都唔係加強得好多,因為一定要係恆常咁做。

羅致光對長者定義一向有獨特見解,唔知會否提高佢做義務巡查員嘅難度呢?佢喺會上話現時最主要問題係有不記名嘅長者八達通,造成濫用漏洞,將計劃擴至60至64歲長者擔心更大,因為喺佢眼中「好多60歲嘅行出去,同50歲唔係好大分別」。

政府話最早下年首季先可以落實計劃,但議員一再要求加快,羅致光重申政府已盡最大努力加快,處理硬件、軟件問題嘅八達通同營運商都會加速工作,仲好坦白咁講「大部分工作唔係政府做,出面做已經快啲㗎喇,如果係政府做,可能唔係13個月,而係更多都唔定」。

相關字詞﹕周浩鼎 兩蚊搭車 勞工及福利局 羅致光

上 / 下一篇新聞