港聞

港聞二

【Emily】工聯會寒夜送暖 探訪露宿者

【明報專訊】近日氣溫急降,寒冬下露宿者嘅情况令人關注。工聯會成員前晚到尖沙嘴海旁,向一班露宿者送上毛氈、口罩、飲品、食物等。立法會議員麥美娟(Alice)話,經歷疫情、反修例示威等多重打擊,失業潮、倒閉潮持續,自從連鎖快餐店被禁晚市堂食後,街上嘅露宿者明顯增多,反映香港嘅貧窮問題不斷惡化,但貧窮線下嘅基層市民一直被政府忽略。

鬧政府忽略貧窮線下市民

Alice話近期本港經濟差,多咗市民要靠人派飯,甚至食「二手飯」填肚;又有市民連禦寒外衣都欠缺,而部分基層無論幾努力工作,鑑於收入微薄等原因,只能露宿街頭。Alice要求政府加強支援同安置露宿者,並正視貧窮問題,希望政府喺增加大量過渡房屋單位時,考慮埋露宿者嘅需要,令佢哋唔使居無定所。

Alice前晚落手落腳派物資,仲幫手搬載滿貨嘅車仔落樓梯,一齊幫手嘅仲有黨友郭偉強、陸頌雄、梁子穎同鄧家彪,佢哋去到尖沙嘴鐘樓附近送暖。陸頌雄話過程中遇到其他同樣熱心嘅朋友,「人間有情,但願這個冬天不太冷」。

相關字詞﹕送暖 麥美娟 工聯會 露宿者

上 / 下一篇新聞