港聞

港聞二

【Emily】發展局長兼顧保育 黎廣德話精神分裂

【明報專訊】深水埗主教山配水庫清拆期間,地下內藏古羅馬式建築風格嘅蓄水池曝光,掀起民間關注,政府其後暫停工程稱會保育。長春社文化古蹟資源中心(CACHe)噚日舉行網上論壇,CACHe創會主席、資深工程師黎廣德批評,事件反映現行古蹟保育制度失敗,話政府2007年將原先由民政事務局長擔任嘅古物事務監督一職,改由發展局長兼任,形容此舉係「精神分裂」:既負責發展,又要兼顧保育,但現實環境內「發展同保育有好多衝突喺入面」,令古蹟保育工作不被政府重視。

倡古物事務監督畀番民政局長做

黎廣德促請政府盡快改革古蹟保育制度,建議將古物事務監督一職,重新交畀民政事務局長擔任,又建議改革古諮會。佢話,古諮會只能倚靠古蹟辦提供資料,但如果古蹟辦唔做嘢,就算民間提供好多資料,古蹟辦一樣可以當無件事,古諮會亦討論唔到,認為古諮會要增設獨立秘書處同研究團隊,同開放平台畀民間參與,例如公眾可提交保育建議畀經改革後嘅古諮會討論,從而令古蹟保育更全面。

陳智遠:要改善古蹟辦工作文化

「活現香港」創辦人陳智遠就話,北角皇都戲院保育事件後,已反映古諮會要提升評核工作,同埋要改善古蹟辦嘅工作文化,認為古蹟辦應該對古蹟有更強嘅敏感度,但今次事件就睇唔到喇。

上 / 下一篇新聞