港聞

港聞二

【Emily】鍾錦麟靠哼林欣彤嘅歌捱過扣押

【明報專訊】53名民主派日前因為組織、參與初選被捕,扣押近40小時後獲准保釋,呢段漫長嘅時間,佢哋喺警署除咗錄口供仲有咩做?民主動力副召集人鍾錦麟(小圖)同Emily講,佢被拘捕當晚,喺羈留室瞓得唔好,本身係林欣彤歌迷嘅佢,最後諗到不斷哼林欣彤嘅歌,時間就過得好快,尤其《光源》兩句歌詞「天昏了黑得很怕冷,呼吸正混亂地往返」,唱出咗佢心聲。

獲准保釋之後,鍾錦麟第一個facebook post都係《光源》嘅歌詞,「銀幕永遠有某點破綻,期望我能撐得過夜晚」。佢話如果真係要坐監,大家可以寄歌詞畀佢。

沙田區議員岑子杰獲釋後就喺fb話,過去幾日佢好感謝耶穌,「因為聖經真係可以讀好耐!」

岑子杰感謝耶穌:聖經可讀好耐

尹佬:睇電視見市民聲援 好鼓舞

噚日民主黨就初選大搜捕事宜開記招,會上民主黨立法會前議員尹兆堅話,佢喺警署羈留室內有得睇電視,見到電視機影住人頭湧湧、影緊門外聲援嘅市民,即使警方不斷威嚇會發出限聚令告票,但各階層市民都堅持表達關心,話對佢而言係好大鼓舞。

相關字詞﹕尹兆堅 岑子杰 鍾錦麟 港區國安法

上 / 下一篇新聞