港聞

港聞二

【Emily】按機制減薪0.2% 區議員拖林鄭落水:一齊減!

【明報專訊】區議員又收到「壞消息」,民政總署去信通知議員,1月起減薪0.2%,即70元。區議員係按過去12個月「甲類消費物價指數」變動調整薪金,有區議員就拖特首林鄭月娥落水,問佢幾時同市民同舟共濟減人工。特首同問責官員係按「丙類消費物價指數」(反映每月平均開支較高住戶)調整薪金,Emily睇到暫時嘅數字,丙類指數變化係不跌反升1%。

1月起每月少70元

民政署信件提到減薪安排,1月起區議員薪金35,000元,少70元;區議會主席70,000元,少140元。區議員係計去年11月嗰陣嘅12個月甲類消費物價指數平均數調薪,但特首同問責官員有啲唔同,喺7月先調整,並計算5月時過去12個月丙類消費物價指數嘅平均值,即係未咁快調整,而去年11月嘅平均數係升1%。

特首辦:已捐薪減薪凍薪

油尖旺區議員林兆彬就話,「林鄭減咗人工未啊?!要減就一齊減!」Emily問特首辦會唔會都減薪,獲回覆話特首同問責官員已喺去年2月宣布將一個月薪酬捐畀香港公益金,又喺去年4月宣布減薪一成,為期12個月,其後仲宣布7月凍薪,話特首當時無按機制加薪2%。

相關字詞﹕減薪 區議員

上 / 下一篇新聞