港聞

港聞二

【Emily】政府未設失業援助金 柯創盛批敷衍、官僚、傲慢

【明報專訊】疫情下有打工仔飯碗不保,建制派議員喺唔同嘅場合多次促請政府設立失業援助金,但政府始終無答應。立法會噚日召開「研究在港設立失業援助制度小組委員會會議」,民建聯柯創盛(圖)狠批政府,話政府一直以來嘅回應態度都好「敷衍、官僚、傲慢」,「我哋花光口水,爭在未跪低㗎啫,佢(勞工及福利局長羅致光)依然左耳入右耳出、聽唔到」。

羅致光:答過唔記得幾多次

柯創盛話落區時,有基層失業工友向佢訴苦,感到痛心、難過,建議小組委員會主席、工聯會陸頌雄會後再游說「勞福局嗰個IQ爆棚嘅局長」。柯仔強調設立失業援助金嘅建議唔係「無的放矢」,呼籲局長「開吓竅、幫吓手」,最後話唔好意思,發言時加入個人感受,但希望秘書將錄音送番畀「IQ局長聽」。

羅致光喺其後嘅人力事務委員會會議回應失業援助金,話已經喺過往嘅立法會質詢環節中,「答過唔記得幾多次喇」,話政府聽到社會嘅聲音,一直都諗緊唔同方法協助市民。

柯仔再追問具體方案,羅致光話「大家都知道政府嘅做事方法……任何方法未想得透徹時,我哋一般唔會行出嚟講」,言論引來議員發笑。

相關字詞﹕羅致光 柯創盛 失業援助金

上 / 下一篇新聞