港聞

港聞二

【Emily】秘書處WFH唔支援 元朗區議員主席房開大會

【明報專訊】公務員在家工作安排延長,區議會秘書處話期間唔提供會議支援服務。元朗區議會噚日決定繼續開會,但會議廳被鎖上,超過20個議員轉到主席房開會。元朗區議員侯文健同Emily講,因為疫情緣故,部分人要企出房外,開會期間亦要開風扇,保持空氣流通。

侯文健話區議會秘書處喺開會前一晚,大約晚上8、9點發電郵通知區議員,話唔會喺會議上提供秘書服務同開會場地,佢認為秘書處未經區議會主席同意就發出通知,等同越權。噚日嘅區議會大會上,區議員處理12月積壓嘅工作,例如交通事項等,並通過動議譴責秘書處。

民政事務總署回應話,鑑於疫情嚴峻,除提供緊急同必要公共服務嘅人員,政府安排僱員留在家中工作至1月20日。為減低病毒喺社區擴散風險,同配合政府嘅整體防疫同工作安排,民政事務總署請各區議會延遲呢段期間嘅會議。

相關字詞﹕疫情 元朗區議會 民政事務總署

上 / 下一篇新聞