港聞

港聞二

【Emily】林景楠被捕 囡囡畫畫呼愛你

【明報專訊】53名民主派日前因為參與、組織民主派初選,被指涉顛覆國家政權被捕,被捕者嘅家人朋友都非常掛心。阿布泰國生活百貨創辦人林景楠嘅facebook噚日上載咗一張林景楠囡囡畫嘅畫,又寫上「I love you Daddy」為爸爸打氣,畫中嘅林景楠悶悶不樂,相信佢獲准保釋後,可以令囡囡安心啲啦。

帖文寫「I love you Daddy」

中西區區議員梁晃維尤其掛心啲貓貓,前日同律師會面時,佢特意叮囑助理「記住餵貓」、「我好掛住啲貓」,噚日助理就喺梁晃維嘅fb上載貓貓嘅生猛照,話「貓已餵」。民協何啟明亦被捕,該黨深水埗區議員李庭豐話,有街坊得知何啟明同貓貓嘅狀况後,到辦事處慰問,更為貓貓送上「新屋企」,貓貓非常鐘意。

另外,立法會前議員朱凱廸噚日一度失蹤,佢嘅fb專頁管理員要出post「尋人」。帖文話,八鄉警署晏晝4點話朱凱廸去咗大埔警署,同事送物資去,但大埔警署話「無此人」;八鄉警署畀咗個電話號碼佢哋查詢,點知佢哋打過去,對方話喺元朗警署,佢哋打去元朗警署,對方又話「無此人」。一眾小編相當焦急朱凱廸去咗邊。

上 / 下一篇新聞