港聞

港聞二

【Emily】有冇監察612基金? 李家超:唔個別評論

【明報專訊】立法會噚日開大會,民建聯周浩鼎就「612人道支援基金」提出口頭質詢,問政府有無監察基金嘅運作係咪合法、會否立法規管網上籌款活動,並建議當局取消向獲資金資助者提供法援。保安局長李家超回應話,唔評論個別基金嘅運作,呼籲市民參與籌款活動時,要先了解其背景同聲稱目的,以免受騙,但佢強調政府有足夠法律打擊有關嘅非法行為,舉例洗黑錢罪、欺詐罪同《港區國安法》等。

話基金撐港獨 葛珮帆無提證據

多名建制派議員要求當局規管衆籌活動,工聯會麥美娟話,衆籌會影響本港國際金融中心嘅地位;民建聯葛珮帆就指控612基金支持港獨,但就無提出實質證據;民建聯何俊賢就追問,法援署調整資源調配嘅彈性有幾大。

李家超回應話,目前政府按網上籌款活動嘅目的、性質作規管,參考其他地方嘅做法亦類似,外國亦非直接規管資金籌集嘅方式。至於有關取消提供法援嘅建議,李家超話會反映,引述法援署會平衡受助人利益,並喺善用公帑嘅情况下,決定係咪有需要繼續為受助人提供法援。

相關字詞﹕李家超 立法會 612人道支援基金

上 / 下一篇新聞