港聞

港聞二

【Emily】立會閘機裝好,再建圍欄

【明報專訊】2019年反修例運動中,有示威者包圍立法會、7月1日闖入立法會,大樓多處受到破壞。立法會之後陸續加強大樓嘅保安設施,Emily噚日見到大樓地下嘅議員出入口,喺室內加裝咗一道閘機同玻璃門,據了解有關工程前日先完成。立法會行管會成員、民建聯陳克勤相信工程後立法會肯定安全啲,但「道高一尺、魔高一丈」,要衝入嚟都阻唔到;不過見到保安漏洞,唔提升保安工作堵塞係唔理想。

陳克勤:要衝入嚟都阻唔到

陳克勤話,當時係行管會一致同意加強保安設施,雖然有唔方便,但無辦法。自反修例事件後,立法會已被水馬同鐵欄包圍逾一年,出面仲有唔同保安工程做緊。陳克勤透露,提升立法會大樓保安工程唔止加閘機,仲有喺大樓外加裝圍欄同花槽。咁幾時先移走水馬?佢話都要等外圍嘅保安工程完成,減低保安風險後先可以,相信都唔會喺3、4個月內可以移走水馬。

鄭松泰:正改建為監獄

熱血公民鄭松泰之前喺立法會辦公室居高臨下睇到外圍保安工程進行中,慨嘆「立法會正在改建為一所監獄,未知那些鐵網會否通電」。

相關字詞﹕陳克勤 保安 反修例運動 立法會

上 / 下一篇新聞