港聞

港聞二

【Emily】第一城新「隱形戰車」鎖違泊車

【明報專訊】駕駛者注意,被車主謔稱為「鎖車城」嘅沙田第一城,最近增聘一間新嘅鎖車公司執行「家法」,當區區議員黃文萱就提醒大家,新公司嘅 「隱形戰車」已現身巡邏,呼籲車主們留意。

第一城嘅管理員以鎖車快「聞名」,開鎖費盛惠320元。黃文萱話,有車主都不滿,泊車唔夠5分鐘,轉個頭已被鎖車,黃文萱都話「佢哋鎖車快過F1方程式賽車換轆」。佢話第一城管理公司最近聘用多一間鎖車公司幫手,屋苑內有兩部「隱形戰車」分更巡邏。外間有說法指管理公司鎖車有錢分,所以多勞多得好進取,而黃文萱就話,據知鎖車罰款,一半確係畀鎖車公司作為行政費、一半係撥歸管理公司帳目。

以往不時有車主同管理員爭拗,甚至試過有車主不滿鎖車,開車去第一城封路抗議。黃文萱就話,屋苑內道路窄、又無落貨區,如果有貨車落貨,再有人違泊,確易造成阻塞,所以溫提一下大家留意,話唔想見到因為鎖車造成城內、城外人士嘅仇恨喎。

相關字詞﹕違例泊車 鎖車 黃文萱 沙田第一城

上 / 下一篇新聞