港聞

港聞二

【Emily】收集盆菜盆送狗場 范國威:400個走唔甩

【明報專訊】過時過節唔少家庭都會食盆菜,新民主同盟早前同狗場合作,收集金屬盆畀狗狗做糧兜、水兜,行動上月31日截止,西貢區議員范國威(Gary)同Emily講,估計收到400個金屬盆「走唔甩」,佢哋送去流浮山、元朗等3個狗場,相信佢哋都有排用,噚日佢先將收到嘅88個盆交畀狗場。Gary同西貢區議會主席鍾錦麟仲將收到嘅盆攤晒出嚟,相當壯觀。

話反應好 幫到狗狗又環保

Gary話今次行動反應好好,佢憶述街坊反應踴躍,新同盟區議員主要集中新界區,但有一次荃灣區議員譚凱邦特意喺荔枝角港鐵站出口收集金屬盆,都收到十幾廿個。Gary甚至收到電飯煲,佢最終捐咗畀「綠在區區」。

今次咁多人響應,Gary認為反映香港人好鍾意寵物,既可以幫到狗狗,又支持環保,一舉兩得;加上香港寸金尺土,金屬盆除非用嚟打邊爐或者整盆菜,否則都用唔着,佢建議製作盆菜嘅餐廳可以回收金屬盆重用,做足清潔就唔會浪費啦。

相關字詞﹕范國威 新民主同盟 盆菜 狗場

上 / 下一篇新聞