港聞

港聞二

【Emily】Lunch哥被鬧黐藍營 泰博斥欺凌弱勢

【明報專訊】外號「Lunch哥」嘅David不時到各處請願、睇《蘋果日報》,狙擊建制派。前日Lunch哥同藍營KOL、被網民稱為「大波man」嘅石房有一齊做節目,回顧去年大事,兩人更乾杯飲酒。事件惹嚟政圈唔少人談論,熱血公民鄭松泰(泰博)噚日喺facebook發文,話𠵱家先批評「Lunch哥」嘅人係「欺凌弱勢社群」,認為應該用行動去拯救對方,而唔係割席、二次欺凌。

同石房有食藍店做直播

歌手何韻詩曾喺facebook形容,有種堅持叫「David」。泰博就話要為Lunch哥討公道,話佢係受害者,之前有人「把明顯的病患者推去政治的火坑活葬」。

離島區議員王進洋就呼籲大家取消喺Lunch哥專頁嘅讚好,又批評Lunch哥靠攏敵人,質問對方有心事點解唔搵同陣營嘅人傾訴,又話自己都好鍾意飲酒,問Lunch哥點解唔搵佢飲。

工聯會鄧家彪噚日亦出post,話Lunch哥竟然同石房有去藍店食晏做直播,佢感嘆話對於迷途嘅年輕人要春風化雨,令佢哋早日回頭,「Lunch哥的轉變,讓我對2021年充滿希望」。

相關字詞﹕石房有 鄭松泰 Lunch哥

上 / 下一篇新聞