港聞

港聞二

【Emily】國安法後兩拒歐美議會對談 傑哥:公民黨未來言行轉低調

【明報專訊】公民黨近月經歷立法會議員被DQ、部分區議員退黨等,令人關注該黨前路。公民黨主席梁家傑(圖)就話,黨內部曾探討係咪要解散,但佢覺得仍然有500幾個黨員,又唔係所有人都退黨,喺社會上仲有一定支持,認為如果公民黨突然停運,好難向支持者交代,又話該黨不至於完全無運作空間。

未至解散 繼續貢獻專業知識

傑哥接受now新聞台節目《大鳴大放》訪問,佢話對於有5個區議員接連退黨感到心痛,但唔算係對黨好大打擊,佢會同黨內27個區議員直接溝通,希望避免再有議員退黨。佢話公民黨要有兩手準備,如果將來有立法會選舉,該黨會有人參與;如社會變成要「全民自救,監察政府」,公民黨亦可扮演有關角色,繼續貢獻專業知識等。

《港區國安法》生效,傑哥話上年7.1之後,已兩次拒絕歐洲議會或美國邀請出席網上對談,認為要「小心啲」,因為對談可能有人講咗啲中央唔啱聽嘅說話,如果佢唔出聲或會被指默認,認為呢啲情况應可免則免。佢話無論大家點唔鍾意國安法,但佢已經存在喺法律之中,「與其『送頭』、硬闖、硬碰,不如保留實力,低調啲」。不過傑哥話如果有駐港嘅外國使節邀請,佢認為出席會面係正常,又話公民黨未來言行都會轉為低調,但強調會繼續講真話。

上 / 下一篇新聞