港聞

港聞二

【Emily】徐英偉容海恩元旦去捐血

【明報專訊】2021年新年伊始,民政事務局長徐英偉(Caspar)同新民黨立法會議員容海恩(Eunice)噚日不約而同去咗捐血。捐血前Caspar仲要一早清埋啲電郵,果然勤力。佢話新年最大願望係「疫情過去,社區清零,大家生活回復正常」。Eunice就呼籲,由於新冠疫情反覆,香港紅十字會話各區捐血站及流動捐血服務嘅收血量持續偏低,有見及此,希望集合大家力量,佢亦身體力行響應去捐血。

張超雄瞓病牀跨年

立法會前議員、工黨張超雄就話「2021年會好嗎?我不敢樂觀。」佢話因為肩頸神經受壓,「痛楚難忍」,除夕都要瞓病牀,喺醫院跨年。佢話2020年絕對唔係開心嘅一年,形容國安法、疫情等帶出無數嘅民生和政治經濟問題,「香港苦、全世界也不好過……面對無休止的政治打壓、弱勢社群的聲音更被邊緣化,怎樣也開心不起來」。

踏入2021年,超雄話「明白民主公義最後必定會戰勝歸來」,但目前大家一定要小心保平安,喺自己崗位上盡可能抗衡不義政權,「留番條命去見證煲底見的一天」。

相關字詞﹕捐血 2021年 容海恩 張超雄 徐英偉

上 / 下一篇新聞