港聞

港聞二

【Emily】談區議員宣誓 藍鴻震諗起 Her Majesty

【明報專訊】近日有風聲指人大常委會將出手處理區議會問題,包括列明區議員要宣誓、估計大量民主派區議員會被指未能符合宣誓內容而被DQ(取消資格)。民政事務局前局長藍鴻震噚日出席立法會議員何君堯成立「國家安全教育中心」記招被問到點睇,佢自言「我入政府嘅時間向(英)女王宣誓㗎,所有人要做政務官,一定要Her Majesty(意指效忠女王陛下)」,認為區議員職責要面對社會,跟上時代。

有區議員聽到有可能DQ消息都出帖講感受。離島區議員梁國豪就話,如任內被褫奪資格,要講聲對唔住、未能以議員身分處理長洲多年社區民生問題,但會繼續以港人身分爭取港人原有自由;又問大家佢轉行做咩好,自言本身做籃球裁判,但𠵱家球場都唔開。屯門區議員張錦雄話,去年屯門鄉郊創有史以來最高投票率,近七成選民投票,最終選佢出嚟,若被DQ、落敗嘅建制派陶錫源「敗部復活」,「大家到底會有什麼想法?你們會叫他陶議員嗎?」

相關字詞﹕宣誓 區議員 藍鴻震

上 / 下一篇新聞