港聞

港聞二

【Emily】院舍變身機艙 院友「飛芬蘭」過聖誕

【明報專訊】港人因新冠病毒疫情「被困」香港,唔少人心思思好想去旅行。位於東涌嘅中度弱智人士宿舍鄰舍輔導會怡東軒嘅職員,前日就合力將院舍「變身」成為客機機艙,仲扮演「機師」、「空姐」,等舍友「即日來回芬蘭」感受白色聖誕。

怡東軒職員一早通知定舍友,話嚟緊有機會「去芬蘭探聖誕老人」,「去旅行要著靚仔少少嘅衫」。當日12名舍友就去「機場」食早餐,將職員事先印定嘅「護照」同「機票」交畀「地勤職員」檢查。「登機」後有空姐空少提供「飛機餐」,去到目的地「芬蘭聖誕老人村」嘅時候,仲有聖誕老人迎接佢哋。

擔任「機師」嘅怡東軒暨怡東綜合就業服務中心主任黎先生話,之前唔少舍友都話「想去旅行」,而近月因為疫情,舍友少咗出街機會,於是職員就用幾個禮拜籌辦呢次活動,一方面想舍友嘗試新事物,另一方面希望教導舍友「原來去旅行會做呢啲嘢」。

上 / 下一篇新聞