港聞

港聞二

【Emily】教玩fb擴光譜 「我著長衫post最多人睇」 網民嘲瞓棺材 葉劉讚有想像力

【明報專訊】新民黨主席葉劉淑儀不時喺facebook上載靚相同大家分享,佢噚日趁聖誕前夕,一身紅噹噹扮成聖誕老人喺聖誕樹旁留影,祝大家有個「抗疫聖誕」。

佢前日接受黨友傅曉琳同民建聯林琳嘅網台節目《全女打》訪問,葉太話會喺fb同IG同年輕人傾偈,對方笑佢都唔會特別嬲,「咁咪講吓笑囉」,例如有人話葉太「瞓棺材」或者「喺棺材走出嚟」,「我咪讚你好有想像力囉,喺棺材行出嚟係好意頭,復活吖嘛!」葉太上周參觀屯赤隧道後,上載咗張喺隧道地下行樓梯上地面嘅相,被網民笑指似由棺材行出嚟。

葉太早前有輯著花花裙嘅相,佢喺訪問透露套裙係意大利牌子、土耳其設計師、中國製造,「唔係貴」,折實後2000幾蚊。林琳請教點保養身材,葉太回應話「你出鏡前食少幾餐囉」。

葉太仲向後輩教路,想擴闊光譜就唔可以成日講政治,佢有留意其fb有咩內容較受歡迎,話三權分立等嚴肅話題,來來去去都係嗰批人睇,而最多人睇嘅post係佢著長衫,第二多係佢去吉野家食牛肉飯。

反修例期間 去南區吉野家「最安全」

佢話上年反修例運動「打緊交」,當時要搵間最安全嘅吉野家,結果去到南區嘅分店,佢當時仲等到間舖停業先敢post,以免連累人哋。

相關字詞﹕棺材 吉野家 葉劉淑儀

上 / 下一篇新聞