港聞

港聞二

【Emily】工聯會工人醫療所70歲 設專科門診

【明報專訊】工聯會工人醫療所原來已成立70年,過去幫助好多基層病人,工聯會噚日喺facebook上載醫療所成立嘅歷史,透露決定喺70歲大日子成立專科門診中心,預計明年首季投入服務。

影片介紹,香港喺1950年代,社會醫療設施極度短缺,勞苦階層患病得唔到診治,工聯會喺1950年7月借用港九勞工教育促進會半邊會址做工人醫療所,當時地方狹小,騎樓、走廊、樓梯時常迫滿就診工人(圖)。1955年工聯會按西醫門診方式成立中醫診所,發展至今有10間中醫診所,係香港主要中醫服務提供者之一;另外亦有6間西醫門診、5間牙科診所等。

工聯會工人醫療所醫務總監黃德祥話,最近介紹長者到公立醫院睇內科,但要等兩年,工聯會遂成立專科門診服務,提供耳科、眼科、婦科等專科服務畀基層,希望基層唔使等咁耐,與公院互補不足,幫手先照顧病人。

有50年前嘅服務使用者話,當時一個五金工友患肺病,那時一日人工唔夠兩蚊,冇錢睇醫生,工聯會醫生聽到後自掏荷包畀15蚊工友去另一名醫生度照X光,另外只收佢兩蚊睇症費。

相關字詞﹕專科門診 工人醫療所 工聯會

上 / 下一篇新聞