港聞

港聞二

【Emily】Ann姐批無失業援助 代市民點歌畀張建宗

【明報專訊】建制派近日持續批評政府抗疫不力,噚日立法會財委會審議抗疫基金,民建聯蔣麗芸(Ann姐)更加話有市民要點首歌Hopelessly devoted to you畀政務司長張建宗聽,Ann姐無解釋點解,呢首係情歌,Emily睇睇歌詞,係講為愛人傷心,又放唔低。

會上Ann姐力批政府,指今次抗疫基金64億當中,有8億幾係應急用,質疑點解唔設特別失業援助金幫助基層。佢話民建聯一眾立法會議員早前都夾咗300幾萬成立基金,向失業家庭發津貼,因為見到地區好多街坊冇得食,「每人(每個議員)拎3個月人工,你哋拎幾多呀?」

無黨派謝偉俊(Paul)都話,市民致電政府都冇人聽,問到可否安排在家工作嘅公務員幫手聽市民電話,「咁多紀律部隊,唔需要拉人時,可唔可以請人維持秩序、送人去醫院,(市民)唔使等死?」

Paul又質疑,點解要等𠵱家先要求外國返港者喺指定酒店檢疫,「係咪要等所有公務員、高官、富商個仔返到嚟香港先閂道門?」張建宗回應時強調,安排係因酒店要深度消毒,本身亦有客人住緊,要客人離開先得。

相關字詞﹕謝偉俊 蔣麗芸 抗疫基金4.0 財委會

上 / 下一篇新聞