港聞

港聞二

【Emily】柯創盛邀陳肇始落區 提黨友向局長反映

【明報專訊】民建聯柯創盛(柯仔)近日頻頻邀請官員落區,除咗民政事務局長徐英偉,食物及衛生局長陳肇始噚日亦應佢邀請到秀茂坪寶達邨,視察該處嘅流動採樣站。柯仔喺facebook上載有關片段,不過當區區議員、民主派馮家龍就無喺片中出現。民建聯黎榮浩、觀塘區議員張培剛就有在場,柯仔仲主動提示黨友張培剛,問佢有無嘢要同局長反映,然後默默讓咗個身位,再推一推對方,等佢行埋陳肇始隔籬。

經柯仔提點,張培剛就問陳肇始,可唔可以開放畀附近屋邨嘅居民用流動採樣站,等更多人可以方便啲做檢測。陳肇始回應話,全港有多個做檢測嘅地點,唔單止呢幾個採樣站。講講吓,柯仔就話有位街坊想同陳肇始傾偈,該街坊叫政府推行強制全民檢測,話有好多年輕人唔出來做檢測。營運採樣站嘅華昇診斷中心董事長、醫管局前主席胡定旭亦有陪同陳肇始視察。

相關字詞﹕寶達邨 柯創盛 陳肇始

上 / 下一篇新聞