港聞

港聞二

【Emily】波叔扮大廚食晒螺絲

【明報專訊】財政司長陳茂波噚日宣布展開新一份財政預算案公眾諮詢,仲扮廚師親身上陣拍宣傳短片,短片一開始由一家人講吓煮嘢建議,陳茂波就著埋大廚衫喺片中嘅電視話,「預備財政預算案就好似煮嘢食,唔知你嘅諗法,又點知你嘅口味?」然後介紹預算案嘅諮詢網站,仲叫大家將主意「話畀波叔知」,片末仲有阿伯一路食飯對住電視講「呢個咪教整餅嘅阿茂?」

宣傳財案公眾諮詢

宣傳片得30秒,陳茂波對白亦唔多,佢喺facebook上載嘅製作花絮,片長超過宣傳片成倍。花絮片先由佢去探班開始,除咗同一眾工作人員講辛苦晒,又親自向各人員送上嘢飲,大sell親民。花絮當然唔少得NG片段,原來幾句對白,陳茂波都食晒螺絲,好似將「雞蛋6隻、糖呢就2茶匙」就錯講成「茶就2茶匙」,其後亦有唔少對白要重拍,陳茂波都要同工作人員講唔好意思。

陳茂波話,由創作意念到落實執行,多得一班台前幕後工作人員,佢呼籲大家積極畀意見,等佢哋可以匯聚大家嘅想法,「盡力量調和一份兼顧不同口味的預算案」。

睇番過去幾條預算案宣傳片,上年主角係卡通蜜蜂,陳茂波未有登場;前年陳茂波則喺片尾接波叫大家畀意見。

相關字詞﹕宣傳短片 財政預算案 陳茂波

上 / 下一篇新聞