港聞

港聞二

【Emily】凍戶風險難料 612籲改「定期月捐」減結存

【明報專訊】立法會前議員許智峯同好鄰舍北區教會嘅銀行戶口被凍結,同樣涉及眾籌。去年反修例運動開始後成立嘅「612人道支援基金」亦有接受公眾捐款,外界關注基金嘅戶口遲啲會唔會被凍結。基金噚日喺facebook發聲明,話基金主要捐款來源同支援開支都係喺香港,出於運作上嘅限制,無法喺外地開設銀行戶口。另外,基金戶口設於匯豐銀行,聲明話無論喺任何本地銀行開戶口,有關戶口嘅運作都要遵守相同嘅法規,所以基金現時未打算喺其他銀行開戶口。

對於許智峯同好鄰舍北區教會嘅銀行戶口被凍結,基金話遺憾,又話如果當局公布唔到具體犯案證據,應該盡快解封涉事者嘅銀行戶口。基金話為咗保護公眾嘅捐款,一直謹慎行事,會諮詢會計師同律師意見,確保基金運作符合法規同銀行要求,但鑑於目前政治氣候同執法尺度並唔清晰,銀行戶口被凍結嘅風險無法估計。

基金呼籲公眾透過捐款網站定額月捐,或定期每月向基金戶口存入捐款,令基金有較穩定收入以應付每月開支,而同時毋須喺銀行戶口儲存龐大結餘。

相關字詞﹕匯豐銀行 眾籌 612人道支援基金

上 / 下一篇新聞