港聞

港聞二

【Emily】港孩長高了 學童生長圖表要重製

【明報專訊】隨住時代變遷、生活環境改善,唔少地方兒童同青少年嘅體重、身高都有改變,香港現時用緊嘅生長圖表喺1993年製作,數據嚟自1970至80年代出生嘅香港人。不過,衛生署初步蒐集數據同文獻發現,𠵱家高小、初中學童比以前高咗少少,當局希望招募2萬名0至20歲市民,制訂新嘅生長圖表。

衛生署聯同香港大學兒童及青少年科學系、中文大學兒科學系做香港生長研究,去年2月開始參考文獻同分析世界各地數據,發現𠵱家高小、初中學童比以前高,另有部分年齡層嘅數據不足,希望透過招募2萬名0至20歲市民,蒐集體重、身高、頭圍等資料。

署方會蒐集公立醫院新生嬰兒、母嬰健康院嘅嬰幼兒嘅數據,亦會喺全港分5區隨機抽選學校,蒐集中小學同大專院校等學生嘅數據。團隊期望明年底完成蒐集,2022年底繪製新嘅生長圖表。

相關字詞﹕衛生署

上 / 下一篇新聞