港聞

港聞二

【Emily】政策被嘲鼓勵感染 諷$5000確診津貼 網民「賣口水」

【明報專訊】港人抗疫足足10個月,少不免要苦中作樂一下。噚日網上掀起一股拎5000元討論熱潮。話說港府話將會發一筆過5000元津貼畀本地感染新型冠狀病毒確診嘅巿民,話因為有市民擔心確診會手停口停。不過,港府嘅「善意」引來唔少批評,有人話變相鼓勵主動感染,揶揄呢個係「最成功嘅扶貧政策」,失業大軍有救。

社會各界都群情洶湧。香港民意研究所副行政總裁鍾劍華喺facebook出帖話有「年輕人喜訊」,嘲諷話「如果招惹到一隻對年輕人冇乜威脅嘅病毒,去測試,先執佢5000,再入公家醫院住幾日攤唞下。係咪好過做兼職?」民主黨鄺俊宇亦喺fb話,咁嘅政策都諗得出,真係令人歎為觀止。沙田區議員趙柱幫fb亦嘲諷問「有無最快嘅確診攻略?仲有冇闊太嗰啲跳舞聚會,可以比小弟抆衫尾參與下,食盡兩家茶禮」。

大批網民取笑政策不符常理、唔合邏輯,又笑話一個人中有5000,咁一家四口中咪有2萬?更有人喺拍賣網等出售「純正確診口水」,笑話有價有市。

陳凱欣質疑確診津貼多過限聚罰款

食衛局前政助陳凱欣都質問今次係乜嘢邏輯,佢話全港市民都要抗疫,只為確診人士提供津貼,會唔會釋出錯誤誘因?佢又話違反限聚令罰款不加,反而確診有更多津貼。

不過,政府稍後先公布派津貼安排,官員就話為咗5000元去染病呢個說法,唔合邏輯。

相關字詞﹕新型冠狀病毒 政府 區議員 抗疫

上 / 下一篇新聞