港聞

港聞二

【Emily】新城堡開幕 迪士尼15周年派15,000門票

【明報專訊】今年係香港迪士尼樂園開園15周年,為感謝粉絲嘅支持,迪士尼搞咗個「FUN 享奇妙夢想」大抽獎,合資格嘅香港居民可以上網報名參加,有機會獲得一日樂園門票或迪士尼探索家度假酒店標準客房住宿一晚。

抽獎報名日期由今日開始至10月30日,只要你係香港居民,有香港身分證就可參加;11歲以下參加者就要有香港出世紙同埋本地學校嘅學生手冊。得獎名單會喺12月9日公布,樂園會送出合共1.5萬張一日標準門票,同埋150份迪士尼探索家度假酒店住宿。

樂園又繼續推出港人優惠,噚日起至明年2月28日,香港居民可用優惠價688元入園兩次。為咗慶祝15周年,華特迪士尼公司亦捐出150萬元畀願望成真基金、兒童癌症基金同生命小戰士會。

另外,原定舊年完工嘅「奇妙夢想城堡」今日正式開幕,噚日舉行開幕典禮。新城堡以迪士尼公主同女王追夢故事做創作靈感,城堡每座塔樓同尖頂都有獨特嘅顏色配搭、標誌圖案同紋理裝飾;另設「奇妙夢想城堡導賞之旅」,只要掃描二維碼,就會有聲音導航帶你行城堡內8個觀賞區。

相關字詞﹕抽獎 公主 迪士尼

上 / 下一篇新聞