港聞

港聞二

【Emily】回應港澳辦讚揚 訝異「我係反對派?」 陳沛然:留喺立會因為疫情

【明報專訊】醫學界議員陳沛然(圖)被歸類為「非建制派」,佢喺民主派宣布總辭後話,疫情下會繼續留任、堅守崗位,同業界、市民抗疫。陳沛然噚日同Emily講多啲佢選擇留任嘅原因,形容「面前支持、反對、棄權3個掣,仲有缺席」,喺呢個世代點揀大家都有唔同意見,𠵱家業界專注抗疫,佢最後按下「留任掣」,主要真係因為疫情,否則考慮或唔一樣,「要頂住」唔想畀人削減政府醫療開支。

港澳辦早前特別讚揚有被標籤為「反對派」嘅議員「沒有被綁架上總辭的戰車」,陳沛然就話:「咁大件事?我係反對派?」;陳又以「辦公室政治」同「球賽榜末定論」比喻,話以前其他人喺度,點都唔到佢成為被針對對象,「𠵱家得兩個咋嘛,明顯落咗降班區,焦點所在;老闆一定成日見到有兩個做得唔好,針對佢哋。如果畀人針對,變咗你做嘢嘅空間細咗」。

留任「唔想醫療開支被削」

陳沛然又同Emily講,唔捨得一班民主派同事,有時佢喺facebook專頁分享音樂,係因為冇心機。

明日大嶼境外投票立場「唔講住」

日後喺議會如何自處,佢話自己有兩個身分:醫生同議員,有人叫佢要中立,佢反問「中咩立呀?做球證咩?我係落場踢波嘅足球員嚟㗎嘛。我喺議會,如果我話唔講政治會畀人笑㗎,同埋我必須要有立場,我最後都要撳掣㗎」。至於「明日大嶼」同境外投票嘅投票立場,佢保持神秘話:「唔透露住,到時投票話你聽。」

相關字詞﹕醫生議員 足球員 非建制派 鄭松泰 醫學界 民主派總辭 陳沛然

上 / 下一篇新聞