港聞

港聞二

【Emily】議案4小時可過 陳帆:感受到議會改變

【明報專訊】立法會噚日續會,冇咗民主派之後,用咗1.5小時討論,之後就舉手通過由工聯會陸頌雄提出嘅「紓緩道路交通擠塞」無約束力議案,計埋前日大會討論咗兩個鐘,成個議案用咗不足4個鐘討論。運輸及房屋局長陳帆總結發言時話,過去兩日感受到議會有改變,大家都實事求是、理性、正面,雖然議員有啲意見同政府唔一致,但都係以事論事。

林鄭大讚建制履行監察政府職能

陳帆又話會將之前建制派都有保留嘅「三隧分流」,到2023年收回西隧後,再提交議會,希望得到議員正面建議同支持。

特首林鄭月娥都喺民主派總辭後藉機大讚建制派履行監察政府嘅憲制職能,唔會為反而反。佢噚日喺facebook出post提到去年《施政報告》落實情况,又讚取消青嶼幹線收費係部分建制派「成功爭取」嘅項目。

Emily聽聞今日部分建制派會同林太會面,就月底出爐嘅新一份《施政報告》畀意見,唔知最後建制派「成功爭取」嘅項目有幾多呢?

相關字詞﹕財委會 建制派 陳帆 民主派總辭 立法會

上 / 下一篇新聞