港聞

港聞二

【Emily】唔係「反對派」 謝偉俊:不如話我進諫派

【明報專訊】建制派噚日開碰頭會,講吓民主派總辭後,陣營嘅大路線同策略,以及日後同政府嘅關係。Emily聽聞,建制派有人對於謝偉俊(Paul)之前喺電台形容自己係「建制派中的反對派」有微言,有人噚日喺會上向Paul提醒咩叫「忠誠反對派」。有建制派就形容,噚日會議係畀機會同事之間交流對日後定位嘅睇法,避免出現尷尬情况。Paul噚日喺facebook上載影片,解釋「與其話我係『反對派』,倒不如話我係『進諫派』,幫政府睇清楚晒所有嘅盲點」。

之前自稱「建制派中反對派」

建制有微言

佢喺影片一開頭就話,知道近日可能因為佢喺訪問嘅發言,導致坊間引發激烈討論,甚至一啲支持建制派嘅KOL都有啲意見。佢話有人問民主派絕迹立法會後,建制派「扮演」咩角色,佢話與其話「扮演」,不如話「擔當」咩角色。佢比喻,一隊波有11個球員,有幾個人被趕出場,剩低嘅球員自不然要「補位」。

話幫政府睇清楚晒所有盲點

佢解釋,如果建制派有黨派係政府10項政策支持9項,反對派就反對晒10項,佢喺中間「我可能10項中支持6項」,「自不然就變了建制陣營嘅相對反對派」。Paul認為,優質民主制度中應有「進諫派」、「改革派」,唔係為反對而反對,而係覺得唔啱嘅時候要進言,甚或要批評,議員扮演嘅角色要有批判性,幫政府望到盲點。

相關字詞﹕建制派 民主派總辭 謝偉俊

上 / 下一篇新聞