港聞

港聞二

【Emily】陳凱欣開公關公司 接job唔排除助選

【明報專訊】高等法院之前裁定劉小麗選舉呈請勝訴,喺嗰次立法會補選勝出嘅建制派陳凱欣屬非妥為當選,阿欣提出上訴,終院喺9月18日拒批上訴許可,佢即時失去議席。事隔兩個月,阿欣同Emily講新動向,話將會做老闆娘開公關公司,希望接job幫人搞吓網上論壇、做主持,甚至會助選,為政治新人提供培訓,教演講、應對傳媒等。佢形容自己做生意係因為「冇得揀」,因為想搵份時間彈性啲嘅工作,等佢可以繼續落區。佢強調,之前儲咗少少資金,公司係佢全資擁有,冇其他人打本畀佢。

阿欣話自己做過記者、非政府機構、立法會議員,仲有埋做政府嘅經驗,市場上未必有齊呢幾種履歷嘅公關。今次係阿欣第一次做生意,佢話以前做社企「好聲」嘅行政總裁時,都要睇住盤數、自負盈虧,佢都有營運一間公司嘅經驗。佢又感恩有老公(前主播邱文華)撐住頭家,等佢可以冇咁大壓力。

阿欣話仲諗緊間公司叫咩名,𠵱家已有4、5個員工,都係佢以前議辦嘅職員,做開facebook設計、拍片等,話可以提供一站式服務,可以有人拍片,仲可以幫客人搵埋主持;現搵緊辦公室,其他接job嘅硬件已經有齊。佢話由於公司未開,所以都係以個人身分接住job先。

相關字詞﹕公關 建制派 立法會議員 陳凱欣

上 / 下一篇新聞