港聞

港聞二

【Emily】轉按中銀3個月 一哥忽然還清樓貸

【明報專訊】美國先後宣布制裁15名中港官員,部分人喺香港有「磚頭揸手」且未還清按揭。警務處長鄧炳強早於8月將名下置富花園單位由匯豐銀行轉按到中銀香港,但根據土地註冊處最新資料顯示,一哥上周向中銀清還晒貸款。曾於銀行做法規部調查主任嘅民主黨屯門區議員盧俊宇覺得事不尋常,因為做按揭首年就提早還清貸款,隨時被罰息2%,佢估計今次係銀行主動要求一哥還錢。

鄧炳強2017年用625萬元購入置富花園單位,先後由匯豐和中銀批出嘅都係不定額按揭(All Monies),即係外界無從得知佢同銀行貸款嘅實際金額。據盧俊宇講,一哥提早還錢係要承擔一定成本,除咗罰息仲有律師費等;佢推測,一哥將物業轉按以至近日向中銀「贖契」,都涉政治考慮。

盧俊宇又話,銀行慣常做法係即時終止被美國制裁者嘅戶口同服務,現時拖咁耐係唔太正常,佢估計一旦美國再施壓,銀行可能會加快終止同被制裁者嘅業務,到時其他被制裁港官可能要提早還錢。據土地註冊處資料,保安局長李家超、警務處國安處高級警司李桂華各持有麗港城一單位,均未向中銀香港還清按揭;警務處副處長(國家安全)劉賜蕙名下嘉富臺單位由創興銀行承按,亦未還清貸款。

上 / 下一篇新聞