港聞

港聞二

【Emily】泛民總辭立會後 工務小組一個鐘 批70億元工程

【明報專訊】民主派立法會議員總辭後,開會好「暢順」。以往泛民會喺工務小組委員會積極發問,開會要用兩個鐘,而噚日朝早嘅工務小組只係用咗一個鐘,就通過咗共涉款70億元嘅6項工程,有啲工程項目更加唔使記名表決,舉手就通過。特首林鄭月娥噚晚都喺facebook出帖讚賞議員,「展示了立法會議員既履行監察政府的憲制職能,又充分重視民生福祉,不會為反而反,也不會走泛政治化的路」。

林鄭讚賞 盧偉國:順暢

噚日會議審批6項工程撥款,其中涉款共約3億元嘅上黃宜坳食水供應系統提升工程同牛潭尾濾水廠擴展工程建議,喺無議員提問下通過,負責答辯嘅官員嚟到齋坐兩分鐘就可以走人。噚日朝早主持工務小組會議嘅副主席、經民聯盧偉國話,冇咗民主派嘅立法會,流程順暢咗好多,大家務實咁去議事。

上星期三,立法會開會途中,人大通過決定取消4個民主派議員資格,泛民喺上周四正式向立法會秘書總辭。噚日立法會開大會,再聽唔到點人數嘅鐘聲,議事廳內更不時空蕩蕩,除咗投票一刻比較人齊,其餘時間都係得10個議員左右。

相關字詞﹕盧偉國 工務小組 泛民總辭 立法會

上 / 下一篇新聞