港聞

港聞二

【Emily】被警拉跌孕婦 誕B女貝貝

【明報專訊】港鐵太子站8.31事件發生一年當晚旺角發生衝突,其間孕婦馮太被警員拉跌。油尖旺區議會副主席、公民黨余德寶話,馮太噚日喺屯門醫院順利誕下女兒,BB女叫做「貝貝」,馮太話多謝大家關心;馮先生就寄望女兒「健康、善良、樂於助人」。余德寶就覺得貝貝好「大命」,媽媽跌親後平安降生,希望貝貝可以喺如今風雨飄搖嘅日子中健康快樂咁成長。

與區議員研投訴警方

馮先生喺旺角衝突當晚涉公眾地方行為不檢被捕,余德寶話馮生月尾要去警署報到。另外,余德寶都同馮太研究緊可唔可以就事件投訴警方,「撞跌咗人哋,當日嘅警員係咪需要負責?」余德寶曾經喺區議會就事件質詢警務處長鄧炳強,馮太當日睇住區議會直播,過後回應話多謝大家幫忙。

鄧炳強喺9月尾出席區議會會議時解釋,當時現場非常混亂,有人作出擾亂公眾嘅行為,警方要拘捕,而被捕者正在懷孕嘅妻子跌倒,警員立即協助、安慰,其後將佢送院;警方亦作出「特別安排」,准許被捕者同妻子前往醫院安頓,再返回警署。余德寶當時反駁,馮太係被警員拉跌,唔係鄧講成嘅無故跌倒,而且馮生係被警方噴胡椒噴霧,需要送院,並唔係獲「特別安排」可以陪同妻子入院。

相關字詞﹕警務處長鄧炳強 831事件 油尖旺區議會

上 / 下一篇新聞