港聞

港聞二

【Emily】中大推網上體驗 籲擦走精神病污名

【明報專訊】社會有好多資訊提醒大家保持心理健康,但就較少提及精神病污名問題。中大「賽馬會心導遊計劃」推出網上體驗旅程,參加者可以用唔同清潔用品,嘗試為精神病者「洗走」污名,但有啲用品係冇用嘅,例如「同情水」、「特別優待皂」(圖)。中大希望參加者走過呢趟旅程後,多啲關注精神病污名問題,日後用正面態度與病人及康復者同行。

Emily登入網站,旅程一開始,網頁出現一個身上滿佈污漬嘅人,原來佢係有精神病經歷嘅人,當公司知道佢有精神病後唔聘請佢,親友又疏遠佢。網頁為參加者提供多個選擇,幫手洗走污名,但有啲係無用㗎。例如參加者用「同情水」係洗唔走污漬,因為「真係好可憐、好慘」呢啲同情說話,會令經歷困難嘅人感到不被接納。網頁提醒參加者,更重要係多啲理解精神病嘅資訊,同埋為康復者爭取權益,等佢哋獲平等對待。

用擦拭污漬比喻反污名,係由中大心理學系博士生李昭明構思,佢希望利用可以想像嘅畫面,代替比較難理解嘅概念或者專業知識,咁大眾就更易明白應該以咩態度正確對待有精神病經歷嘅人。網頁為antistigma.psy.cuhk.edu.hk

相關字詞﹕污名化 精神病 賽馬會 中大

上 / 下一篇新聞