港聞

港聞二

【Emily】憶港英時代 譚惠珠自揭花名「西珠」

【明報專訊】香港基本法委員會前主任喬曉陽噚日參加《基本法》頒布30周年法律高峰論壇,主持對談,嘉賓有前律政司長梁愛詩、港澳辦前副主任馮巍、基本法委員會副主任譚惠珠(珠姐,圖)。珠姐憶述起草基本法74條有關立法會議員提案權時,話「有兩個『珠』,不是兩隻豬,一個是『東珠』廖瑤珠(已故港區人代),一個是『西珠』叫譚惠珠」,自己講完都忍唔住笑。佢話當時提出議員私人提案涉政府政策問題,要特首有書面證明先可以提,目的係符合行政主導。

講番1980年代,草委由唔同界別人士組成,當時譚惠珠係港英年代嘅議員,被視為港英代表;廖瑤珠同中方關係密切,所以係東方代表,所以有雙珠花名。

喬曉陽喺對談開始時,細數席上4人中邊個研究基本法最老資格,雖然大家都長期同基本法「打交道」,但程度唔同,話資格最老係譚惠珠,因為佢係基本法起草委員會委員,付出好多心血;梁愛詩唔係草委,但喺香港接觸基本法都好早;馮巍就係「四大護法」(即內地4名已故法學家)之首、基本法政治體系一章起草人蕭蔚雲嘅高徒,1988年開始研究基本法。喬老自言係「最晚」嘅,到1995年特區籌委會成立,擔任委員先開始研究基本法。

相關字詞﹕梁愛詩 馮巍 譚惠珠 喬曉陽 基本法委員會

上 / 下一篇新聞