港聞

港聞二

【Emily】唔畀區會傾歷史館 政府:係全港設施

【明報專訊】今屆區議會,唔少區議員提交嘅文件、議案都被指不符《區議會條例》,不被納入議程。油尖旺區議員陳嘉朗噚日話,早前向區議會地區設施管理委員會提交文件,要求關注香港歷史博物館「香港故事」閉館、餐廳停標問題等,噚日開會時被署方拒絕,指歷史博物館係「全港性設施」,並非油尖旺地區層面事宜。

區議員質疑:點解上屆得𠵱家唔得

陳嘉朗質疑,去年3月上屆區議會康文署曾經提交文件,討論科學館及歷史博物館嘅擴建計劃,「為何當時可以討論香港歷史博物館,現時就不能?」佢同Emily講,議程並唔係政治爭議嘢,好多人對於被指不符《區議會條例》都「搲爆頭」,甚至話有建制派私下都認為討論冇問題,質疑如果區內圖書館有其他區讀者,係咪又會被視為「全港性設施」。佢話噚日因為太趕,就算可以討論議程,都邀請唔到收藏家代表列席,所以叫民政總署諗清楚、當成待議事項。

民政事務總署回應時都係話,由於有關內容並非油尖旺地區層面事宜,徵詢相關部門意見後,對其屬於《區議會條例》第61條所述嘅區議會職能有保留。

相關字詞﹕民政事務總署 博物館 康文署 區議員 區議會 政治 建制派

上 / 下一篇新聞