港聞

港聞二

【Emily】警帖被指抄鬼滅之刃 日高官都回應

【明報專訊】香港警察再次「揚名」海外。上星期五(13日)警方喺facebook貼咗一張「提子治郎•騙滅之刃」宣傳圖片,呼籲提防騙案。圖中警方角色「提子」,同近期大熱嘅日本動漫《鬼滅之刃》嘅主角「炭治郎」造型非常相似,令網民質疑警方涉嫌抄襲、侵犯版權,話警方「知法犯法」。事件「提升」到國際層次,連日本內閣官房長官加藤勝信噚日亦回應事件,話保護日本動畫嘅版權非常重要,會好好作出應對。

警否認侵權:環繞吉祥物「提子」構思

香港警方回應時就否認侵權,話今次圖片係環繞防騙吉祥物「提子」而構思同繪畫,「並不涉及對任何著作進行複製、安排複製或發放任何其複製品」。警方話,製作呢張圖片,旨在向公眾傳遞簡單易明嘅防騙信息,並鼓勵市民提醒身邊親友,目的同性質都符合公眾利益。

前香港眾志成員周庭前日喺Twitter講呢件事,話事件引起日本網民同TBS等日本媒體關注,估唔到連日本官員都出聲,話今次日本社會嘅反應都超出佢嘅預期,可見日本係一個相當重視版權嘅國家喎。

相關字詞﹕侵犯版權 周庭 香港警察 提子 鬼滅之刃

上 / 下一篇新聞