港聞

港聞二

【Emily】唐樓起緊火 徐英偉貼糖水照 惹網民批評 民政局長:Multitasking冇衝突

【明報專訊】油麻地唐樓餐廳前晚大火造成7死7危,特首林鄭月娥深夜發聲明表示極度哀痛;但火警期間,民政事務局長徐英偉就喺個人嘅facebook度上載喺源記食糖水嘅相片,並表達「覺得滿意」嘅心情,引來大量網民批評,包括輔仁媒體總編輯容樂其,有人留言直斥「朱門酒肉臭、路有凍死骨」。徐英偉噚日朝早留言回應網民,話民政局同事通宵工作,政府會繼續協助受害者及其家人。

噚日慰問尼泊爾族裔長老

容樂其留言批評,質疑徐英偉「你食糖水還你食糖水,同事做嘢還同事做嘢,無衝突嘅,係咪~?」徐英偉噚日朝早回應話,自己有落手落腳聯絡、安排居民等,「(我)仍然有時間覆你的關注,Multitasking (同時做多件事)冇衝突」,附加一個眨眼emoji。民政事務局噚日喺facebook發文,話徐英偉到訪「油尖旺多元文化活動中心」,就火災向尼泊爾族裔長老表示深切哀痛同高度關注,表示民政事務總署會盡力提供協助。

不過,網民似乎仍唔係好受落呢個解釋,有人批評政府「出相做show(表演)最快手」;中西區區議員葉錦龍喺民政局fb留言,話徐英偉「喺西營盤食住藍店糖水出post(帖文)吖嘛」。

Emily睇翻資料,傳媒喺前晚大約9點分別報道大火消息,至約10點傳出有人死亡;徐英偉約於9點46分上載食糖水相片。

相關字詞﹕大火 油麻地 徐英偉

上 / 下一篇新聞