港聞

港聞二

【Emily】「不論黃藍」 CY話幫年輕人北上搵工

【明報專訊】社會對年輕人有唔同評價,有人話要放棄年輕人,曾批評年輕人上街抗爭嘅全國政協副主席、前特首梁振英(CY)就話,唔應該放棄年輕人,仲話想幫年輕人返內地發展搵工,佢話「政治還政治,但年輕人就業一定要幫,無論黃嘅、藍嘅、紅嘅咩嘢嘅,一定要幫」。

CY出席工聯會鄧家彪同陳婉嫻嘅網上訪談節目,阿彪問CY,話佢畀人印象「喺大是大非事情上企得好硬」,但又話會畀機會年輕人。CY答話絕大多數年輕人守法,又話都有同唔少年輕人交流,「我覺得我哋唔能夠話放棄年輕人,唔應該放棄今年畢業嘅年輕人,當然如果佢哋犯法嘅,𠵱家法庭每日有案件,佢哋要接受懲罰。懲罰後點樣,以後再講,但絕大多數年輕人,佢哋畢業後到𠵱家無工作做,對個人、家庭及社會層面,都會造成不穩 」。

殺人作喻:學校不容討論港獨

CY亦話,喺大是大非問題上,一定要企得穩,例如港獨,係無價講,學校唔可以討論,仲以殺人做比喻,話毋須討論喎。

嫻姐就話,𠵱家社會對立,「你講YES,佢(青年)會講NO」;話要畀年輕人機會,政府都要諗吓,要多種手法管治,手段上要令大家有啲鬆動位,畀年輕人接受先得。

相關字詞﹕陳婉嫻 鄧家彪 梁振英

上 / 下一篇新聞